---

Fjölmargar rannsóknir hafa verið gerðar á gildi útikennslu sem benda ótvírætt til margvíslegra jákvæðra áhrifa sem af útikennslu hlýst. Útikennsla hefur jákvæð áhrif á líkamlegt heilsufar barna (m.a. með aukinni hreyfigetu, samhæfingu, jafnvægi og þoli), á andlegt heilsufar barna (m.a. með auknu sjálfstrausti og bættum samskiptum, samvinnu og einbeitingu), útikennsla eykur fjölbreytni í kennsluháttum, eflir áhuga jafnt nemenda sem kennara og stuðlar að bættum námsárangri. Mikilvægt er að efla jákvæð tengsl nemenda við náttúruna strax á unga aldri því það stuðlar að auknum áhuga þeirra á umhverfinu, útiveru og náttúruvernd framtíðarinnar. Barn sem trúir því að það geti haft jákvæð áhrif á nærumhverfi sitt er líklegra til að vilja leggja lóð sín á vogarskálarnar síðar meir. Börn þurfa að upplifa náttúruna á eigin forsendum og vinna svo áfram með þá upplifun í skólanum í samstarfi og samvinnu barna og fullorðinna. Í nærumhverfi skólans er gnótt tækifæra til útikennslu, svo sem útikennslustofan Lundur, skógræktin, Hamarinn, Lystigarðurinn Fossflöt, Varmá, Reykjafoss, Hveragarðurinn, Reykir, Garðyrkjuskóli ríkisins, Reykjafjall og umhverfiHeilsustofnunar NLFÍ. Í þokkalegri göngufjarlægð eru m.a. Núpafjall, Hellisheiði, heiti lækurinn í Reykjadal og í lengri fjarlægð en vel göngufærri eru svo m.a. Hellisheiðarvirkjun, eldstöðin Hengill, háhitasvæðin Ölkelduháls og Bitra, Hveradalir, Skálafell og fleiri markverðir staðir.
Unnið af: Ólafi Jósefssyni og Sveinbirni Ásgrímssyni.

Hönnun síðu: Sveinbjörn Jón Ásgrímsson